Guntur Karam: స‌ర్కారు వారి పాట సినిమాతో చివ‌రిగా ప‌ల‌కరించిన మ‌హేష్ బాబు ప్ర‌స్తుతం త్రివిక్రమ్ ద‌ర్శ‌క‌త్వంలో గుంటూరు కారం అనే సినిమా చేస్తున్నాడు. ఈ సినిమా షూటింగ్ న‌త్త‌న‌డ‌కన సాగుతున్న‌ట్టు తెలుస్తుంది. కొందరు టెక్నీషియన్స్‌ని మ‌ధ్య‌లో తొల‌గించ‌డం లేదంటే, మ‌హేష్ షూటింగ్‌కి బ్రేక్ ఇచ్చి విహార‌యాత్ర‌ల‌కి వెళ్ల‌డం వ‌ల‌న చిత్రీక‌ర‌ణ ఆలస్యం అవుతూ వ‌స్తుంది.ఇక ఈ చిత్రం కథ ప‌లుసార్లు మారింద‌ని ఇటీవ‌ల ప్ర‌చారం సాగింది. ఏది ఏమైన ఈ సినిమాకి సంబంధించి జ‌రుగుతున్న ప్ర‌చారం మాత్రం మ‌హేష్ అభిమానులని మాత్రం కొంత ఆవేద‌న‌కి గురి చేస్తుంది.
ఇక ఇదిలా ఉంటే గుంటూరు కారం సినిమా స్టోరీ లైన్ అంటూ ఒక కథ ప్రచారంలోకి రాగా, దీనిపై అభిమానులలో అనేక అనుమానాలు త‌లెత్తుతున్నాయి. పాపులర్ వెబ్ సైట్ అయిన ఐఎమ్‌డీబీ ఈ సినిమా గురించి ఒక సినాప్సిస్ ఇవ్వ‌గా, అందులోని క‌థ‌నం ప్ర‌కారం మ‌హేష్‌బాబు గుంటూరు డాన్‌గా క‌నిపించ‌బోతున్నారని, సిటీలో జ‌రిగే అన్యాయాలు అక్ర‌మాల‌పై పోరాడుతోన్న ఓ జ‌ర్న‌లిస్ట్‌తో మ‌హేష్‌బాబు ప్రేమ‌లో ప‌డ‌తాడ‌ని, ఆమె ల‌క్ష్యానికి ఆ డాన్ ఎలా అండ‌గా నిలుస్తాడ‌న్న‌ది చిత్ర క‌థ‌గా చెబుతున్నారు. చాలా స‌ర్‌ప్రైజ్‌లతో క‌థ‌ని త్రివిక్రమ్ డిజైన్ చేశాడ‌ని చెబుతున్నారు. మ‌రి ఇందులో ఎంత నిజం ఉంద‌నేది తెలియాల్సి ఉంది.
ఇక అత‌డు, ఖ‌లేజా వంటి చిత్రాల త‌ర్వాత మ‌హేష్‌బాబు, త్రివిక్రమ్ కాంబోలో గుంటూరు కారం అనే చిత్రం రూపొందుతుంది. ఈ సినిమాని హారిక హాసిని క్రియేషన్స్, సితార ఎంట‌ర్‌టైన్‌మెంట్స్ సంస్థలు నిర్మిస్తుండ‌గా, మూవీకి త‌మ‌న్ అద్భుత‌మైన సంగీతాన్ని అందిస్తోన్నాడు. మహేశ్ బాబుతో స్టార్ డైరెక్టర్ త్రివిక్రమ్ శ్రీనివాస్ చేస్తున్న మూడో సినిమా ఇది కాగా, వీరిద్ద‌రి కాంబినేష‌న్‌లో వ‌స్తున్న ఈ చిత్రం హ్యాట్రిక్ కొడుతుందని కొందరు ఆశాభావం వ్య‌క్తం చేస్తున్నారు. ఇప్ప‌టి వ‌రకు సినిమాకి సంబంధించి విడుద‌లైన ప్ర‌చార చిత్రాలు సినిమాపై అయితే అంచ‌నాలు భారీగా పెంచాయి. ఇక ఈ సినిమా పూర్తైన త‌ర్వాత మ‌హేష్ బాబు.. రాజ‌మౌళి ద‌ర్శ‌క‌త్వంలో ఓ భారీ బడ్జెట్ చిత్రం చేయ‌నున్నాడు. ఈ సినిమా అత్యంత ప్ర‌తిష్టాత్మ‌కంగా రూపొంద‌నుంది
