Bro Teaser: జనసేన పార్టీ అధినేత పవన్ కళ్యాణ్ ఒకవైపు రాజకీయాలను చూసుకుంటూనే.. మరోవైపు టాలీవుడ్‌లో వ‌రుస సినిమాల‌తో ప్రేక్షకులని అల‌రించే ప్ర‌య‌త్నం చేస్తున్నాడు. గత కొద్ది రోజులుగా వారాహి యాత్ర చేస్తున్న పవన్ తన ప్ర‌సంగంతో అద‌ర‌గొడుతున్నాడు. పవన్ స్పీచ్ వినేందుకు జ‌నాలు తండోప‌తండాలుగా స‌భాస్థ‌లికి వ‌స్తున్నారు. దీంతోఆ ప్రాంగ‌ణాల‌న్నీ జ‌న‌సంద్రంగా మారుతున్నాయి. అయితే పవన్ న‌టించిన బ్రో చిత్రం మ‌రి కొద్ది రోజుల‌లో విడుద‌ల కానుండ‌గా, ఈ సినిమా ప్ర‌మోష‌న్ స్పీడ్ పెంచారు. కొద్ది సేప‌టి క్రితం మూవీ టీజర్ విడుద‌ల చేశారు. ఇది చాలా ఆక‌ట్టుకుంటుంది. కాలం మీ గ‌డియారానికి అందని ఇంద్ర‌జాలం అనే డైలాగ్ ఆక‌ట్టుకుంటుంది.
జూలై 28న విడుద‌ల కానున్న బ్రో చిత్రం తమిళంలో హిట్ అయిన వినోదయ సిత్రం మూవీకి రీమేక్‍గా రూపొందుతుంది. ఈ చిత్రానికి సముద్రఖని ద‌ర్శ‌క‌త్వం వ‌హించాడు. చిత్రంలో పవన్ క‌ళ్యాణ్‌తో పాటు సాయిధ‌ర‌మ్ తేజ్ కూడా న‌టిస్తున్నాడు. గత ఫిబ్రవరిలో చిత్ర షూటింగ్‌ ప్రారంభం అయింది. షెడ్యూళ్లను వెంట వెంట‌నే పూర్తి చేసి టాకీ పార్టును ఎవరు ఊహించనంత వేగంగా కంప్లీట్ చేసారు. అంతా పూర్తి కావ‌డంతో ఇక మూవీ ప్ర‌మోష‌న్స్ లో జోరు పెంచ‌బోతున్నారు. టీజర్ సినిమాపై చాలా అంచ‌నాలు పెంచింది. పవన్ కళ్యాణ్ జ్వరంతో బాధపడుతున్నా కూడా బ్రో టీజర్ కోసం డబ్బింగ్ చెప్పాడు. ఏపీలోని మంగళగిరిలో తన పార్టీ జనసేన కార్యాలయంలోనే టీజర్ డబ్బింగ్ పూర్తి చేశాడు పవన్. చిత్ర దర్శకుడు సముద్రఖని స్వయంగా వెళ్లి డబ్బింగ్ చెప్పించాడు. ఇందుకు సంబంధించిన ఫొటోలు, వీడియోలు కూడా వైర‌ల్‌గా మారాయి.
ఇద్ద‌రు మెగా హీరోల కాంబినేషన్‌లో రాబోతున్న ‘బ్రో చిత్రంలో క‌థానాయిక‌లుగా కేతిక శర్మ, ప్రియా ప్రకాశ్ వారియర్ నటించారు.. పీపుల్స్ మీడియా ఫ్యాక్టరీ సంస్థ ఈ చిత్రాన్ని ప్రతిష్టాత్మకంగా నిర్మిస్తోంది. మూవీకి త్రివిక్రమ్ డైలాగ్స్, స్క్రీన్‌ప్లే అందిస్తుండ‌గా, థ‌మ‌న్ సంగీతం అందిస్తున్నారు. చిత్రం మంచి విజయం సాధిస్తుంద‌ని మెగా అభిమానులు భావిస్తున్నారు. ఇక పవన్ కళ్యాణ్ హ‌రీష్ శంక‌ర్ దర్శకత్వంలోను, క్రిష్ దర్శకత్వంలోను, సుజీత్ డైరెక్ష‌న్ లోను సినిమాలు చేస్తున్న విష‌యం తెలిసిందే.
