Bigg Boss 7: బుల్లితెర ప్రేక్ష‌కుల‌కి మంచి వినోదం పంచే రియాలిటీ షోల‌లో బిగ్ బాస్ ఒక‌టి. విదేశాల‌లో మొద‌లైన ఈ షో మెల్ల‌గా హిందీలో అడుగుపెట్టి అక్క‌డ మంచి ఆద‌ర‌ణ ద‌క్కించుకొని ఆ త‌ర్వాత ప‌లు భాష‌ల‌కి పాకింది. తెలుగు, త‌మిళం, మ‌ల‌యాళం ఇలా ప‌లు ప్రాంతీయ భాష‌ల‌లో మంచి టీఆర్పీ ద‌క్కించుకుంది. తెలుగు విష‌యానికి వ‌స్తే ఇక్క‌డ ఈ షో ఆరు సీజ‌న్స్‌తో పాటు ఒక ఓటీటీ సీజన్ పూర్తి చేసుకుంది. త్వ‌ర‌లోనే సీజన్ 7 ప్రారంభం కానుంద‌ని కొద్ది రోజులుగా వార్త‌లు వినిపిస్తుండ‌గా, ఎట్ట‌కేల‌కు మేక‌ర్స్ ప్రోమోతో క్లారిటీ ఇచ్చారు. ఈ ప్రోమోతో షో త్వ‌ర‌లోనే మొద‌లు కానుంద‌ని క్లారిటీ వ‌చ్చింది.
అయితే తాజాగా విడుద‌లైన ప్రోమోలో ఎలాంటి డిటైల్స్ షేర్ చేయలేదు. కేవలం సీజన్ 7 లోగో ఆవిష్కరించి, హోస్ట్ ఎవరనే సస్పెన్స్ మాత్రం కొన‌సాగించారు. తొలి సీజన్ ఎన్టీఆర్ హోస్ట్ చేయ‌గా, ఆ సీజన్ మంచి హిట్ అయింది. ఇక సీజన్ 2 హోస్ట్ గా హీరో నాని వ్యవహరించ‌గా, సీజన్ 3 నుండి నాగార్జున కొనసాగుతూ వ‌స్తున్నారు. అయితే ఆరు సీజ‌న్స్‌ల‌లో మొద‌టి ఐదు సీజన్స్ మంచి ఆద‌ర‌ణ ద‌క్కించుకున్నా ఆరో సీజన్ మాత్రం దారుణ‌మైన రేటింగ్ ద‌క్కించుకుంది. కనీసం సీరియల్ కి వచ్చే రేటింగ్ కూడా రాక‌పోవ‌డం నిర్వాహ‌కుల‌కి షాకింగ్‌గా మారింది.
సీజన్ 6లో వీకెండ్స్ కి కూడా కూడా 4 రేటింగ్ దాటలేకపోయింది. చెప్పాలంటే సీజన్ 6 మొత్తం విమ‌ర్శ‌లు ఎక్కువ వినిపించాయి. స్ట్రాంగ్ కంటెస్టెంట్స్‌ని బ‌య‌ట‌కు పంపించ‌డం, అన్ని ముందుగానే లీక్ కావడం, తెలియని కంటెస్టెంట్స్ హౌజ్‌లో అడుగుపెట్ట‌డం, షో మ‌రీ లేట్ గా ప్ర‌సారం కావడం వంటివి సీజన్ 6 రేటింగ్ మ‌రింత త‌గ్గేలా చేశాయి. సీజన్ 6 ఫెయిల్యూర్స్ నుండి కొన్ని పాఠాలు నేర్చుకున్న నిర్వాహకులు సీజన్ 7 గట్టిగా ప్లాన్ చేశారని తెలుస్తుంది. నాగార్జున స్థానంలో వేరే హోస్ట్‌ని తీసుకోవ‌డంతో పాటు కంటెస్టెంట్స్ విష‌యంలో కూడా ప్ర‌త్యేక శ్ర‌ధ్ద పెట్టార‌ని టాక్ .తాజాగా విడుద‌లైన ప్రోమోలో లోగో త‌ప్ప ఎలాంటి ఇన్ఫ‌ర్మేష‌న్ ఇవ్వ‌ని నిర్వాహకులు త‌ర్వాతి ప్రోమోలో మాత్రం హోస్ట్ ఎవ‌ర‌నేది త‌ప్పక రివీల్ చేయ‌నున్నారు.
