Dilraju Party: టాలీవుడ్ అగ్రనిర్మాతల్లో ఒక‌రైన దిల్ రాజు.. నితిన్‌తో తీసిన దిల్ సినిమాతో త‌న ఇంటిపేరుని దిల్‌గా మార్చుకున్నారు. వీవీ వినాయక్ దర్శకత్వంలో దిల్ సినిమా తెర‌కెక్క‌గా, ఈ చిత్రం దిల్ రాజుకి తొలి సినిమా. ఈ మూవీ అత‌నికి కాసుల వర్షాన్ని కురించింది. అంతేకాదు ఈ చిత్రం ఇంటిపేరుగా పెట్టుకునేంత గా గుర్తింపు తీసుకువచ్చింది. అప్ప‌టి నుండి దిల్ రాజుగా మారిన ఈయన చిన్న సినిమాల‌తో పాటు పెద్ద సినిమాలు చేస్తూ ఇండ‌స్ట్రీకి బ్యాక్ టూ బ్యాక్ హిట్స్ అందిస్తున్నారు. కెరీర్ స‌జావుగా సాగుతున్న‌ప్ప‌టికీ ఆయ‌న ప‌ర్స‌న‌ల్ లైఫ్‌లో పెద్ద విషాద‌మే చోటు చేసుకుంది.
కొన్నేళ్ల క్రితం దిల్ రాజు మొదటి భార్య అనిత అనారోగ్య సమస్యలతో మరణించింది. ఆ త‌ర్వాత దుఃఖంలో మునిగిపోయిన దిల్ రాజు చాలా రోజుల పాటు సింగిల్‌గానే ఉన్నారు. క‌రోనా స‌మ‌యంలో మరో వివాహం చేసుకున్నాడు. దూరపు బంధువు అయిన తేజస్విని రెండో పెళ్లి చేసుకోగా, గ‌త ఏడాది వీరికి బాబు కూడా జన్మించాడు. 50 ఏళ్ళ వయసులో దిల్ రాజు మరోసారి తండ్రి కావ‌డం హాట్ టాపిక్ అయింది. ఇక జూన్ 29తో బాబు పుట్టి ఏడాది కావ‌డంతో దిల్ రాజు త‌న కుమారుడి బ‌ర్త్ డే వేడుక‌ల‌ని జేఆర్సీ క‌న్వెన్ష‌న్ హాల్‌లో గ్రాండ్‌గా నిర్వ‌హించారు. ఈ వేడుక‌కి సినీ, రాజ‌కీయ ప్ర‌ముఖులు భారీగా త‌ర‌లి వ‌చ్చారు.
టాలీవుడ్ ఇండ‌స్ట్రీకి చెందిన అగ్రనటులతో పాటు, చాలామంది దర్శకులు, సాంకేతిక నిపుణులు, ఇతర నిర్మాతలు సైతం ఈ వేడుక‌కి హాజ‌ర‌య్యారు. అయితే వేడుక‌లో మహేష్ బాబు, అత‌ని కూతురు స్పెష‌ల్ అట్రాక్ష‌న్‌గా నిలిచారు. వైట్ కలర్ దుస్తుల్లో వారిద్ద‌రు ఈవెంట్‌లో కనిపించి సందడి చేసారు. మహేష్, సితార అలా న‌డుచుకుంటూ వ‌స్తుంటే వారిద్ద‌రిని త‌మ కెమెరాల‌లో బంధించారు. ప్ర‌స్తుతం సితార, మహేష్ బాబుల‌కి సంబంధించిన పిక్స్ సోష‌ల్ మీడియాని షేక్ చేస్తున్నాయి. దిల్ రాజు, మహేష్ బాబు కాంబినేష‌న్‌లో ప‌లు చిత్రాలు రాగా, ఈ చిత్రాలు పెద్ద విజ‌యాలు సాధించాయి.
