Gaddar: త‌న గొంతుకతో ఎంతోమందిని చైత‌న్యవంతుల‌ని చేసి పెత్తందారుల గుండెల్లో రైళ్లు ప‌రుగెత్తించిన ప్ర‌జా యుద్ధ నౌక్ గద్ధర్ అలియాస్ గుమ్మ‌డి విఠ‌ల్. పొడుస్తున్న పొద్దుమీద న‌డుస్తున్న కాల‌మా అనే పాట‌ల‌తో ప్ర‌కంప‌న‌లు పుట్టించారు. చివ‌రిగా కాంగ్రెస్ నాయ‌కులు ఖ‌మ్మ‌లో ఏర్పాటు చేసిన ఖ‌మ్మం స‌భ‌లో క‌నిపించిన గద్ధర్ ఆదివారం మ‌ధ్యాహ్నం అమీర్‌పేట్‌లోని అపోలో స్పెక్ట్రా ఆసుపత్రిలో చికిత్స పొందుతూ కన్నుమూశారు. ఆయన 1949 జూన్ 5న తెలంగాణ రాష్ట్రంలోని తూప్రాన్‌లో జన్మించ‌గా, నిజామాబాద్‌లో విద్యాబ్యాసం కొన‌సాగించారు. ఇక 1975లో కెనరా బ్యాంకులో ఉద్యోగం చేశారు. అయితే గద్దర్ మృతి ప్ర‌తి ఒక్క‌రిని శోక సంద్రంలోకి నెట్టింది. అభిమానులు, కవులు, కళాకారులు, రాజకీయ, సినీ ప్రముఖులు ఆయ‌న‌కు ఘ‌న నివాళులు అర్పిస్తున్నారు.
గద్ధర్ జులై 20న తీవ్రమైన ఛాతినొప్పితో అపోలో ఆసుపత్రిలో చేరగా.. ఆగస్టు 3న బైపాస్‌ సర్జరీ చేయించుకున్నారు. ఆపరేషన్‌ సక్సెస్‌ అయినట్లు వైద్యులు కూడా ప్రకటించిన, ఆయన ఇలా స‌డెన్ గా మృతి చెందడం ప‌లువురిలో అనుమానులు రేకెత్తిస్తుంది. అయితే గద్దర్ మృతికి గల కారణాలను తాజాగా వెల్లడించారు అపోలో వైద్యులు. గద్ధర్.. ఊపిరితిత్తులు, యూరినరీ సమస్యలతో కొన్నాళ్లుగా బాధపడుతున్నారు. వాటి నుంచి పూర్తిగా కోలుకోలేకపోవడంతో గద్దర్ ఆరోగ్యం మరింత క్షీణించి క‌న్నుమూసిన‌ట్టు వైద్యులు చెప్పుకొచ్చారు. కాగా గద్దర్‌కు భార్య, సూర్యుడు, చంద్రుడు, వెన్నెల అనే ముగ్గురు సంతానం ఉన్నారు.
గద్ధర్ మృత‌దేహాన్ని ఆదివారం సాయంత్రం నుంచి.. ఎల్బీ స్టేడియంలో ఉంచ‌గా, ఆయ‌న‌కి క‌డ‌సారి నివాళులు అర్పించేందుకు బంధువులు, అభిమానులు, ఉద్యమకారులు..భారీగా త‌ర‌లి వ‌స్తున్నారు. చివ‌రిగా ఆయనతో తమకి ఉన్న అనుబంధాన్ని పంచుకుంటున్నారు. సోమవారం ఉదయం 11 గంటలవరకూ గద్ధర్ పార్థీవదేహాన్ని అక్కడే ఉంచి.. ఆ తర్వాత.. అల్వాల్‌లోని గద్దర్ ఇంటికి తీసుకెళ్తారు. అక్కడి నుంచి అంతిమయాత్ర కొనసాగ‌నున్న‌ట్టు తెలుస్తుంది. ఆల్వాల్‌లో గద్దర్ స్థాపించిన మహోబోధి విద్యాలయంలోనే ఆయన అంత్యక్రియలు జ‌ర‌గ‌నున్నాయి. స్కూల్ ఆవరణలోనే అంత్యక్రియలు నిర్వహించాలనేది గద్దర్ చివరి కోరికని , అందుకే అక్కేడే ఏర్పాట్లు చేయ‌మ‌ని ఆయన సతీమణి విమల సూచించిడంతో కుటుంబీకులు, కళాకారులు ఏర్పాట్లు చేస్తున్నారు. ప్ర‌భుత్వం లాంఛ‌నాల‌తో గ‌ర్ధ‌ర్ అంత్యక్రియలు జ‌ర‌గ‌నున్నాయి.
