Bigg Boss Telugu: బుల్లితెర ప్రేక్ష‌కుల‌కి మంచి వినోదం పంచుతున్న బిగ్ రియాలిటీ షో బిగ్ బాస్. ఈ కార్య‌క్ర‌మం తెలుగులో సీజన్ 7 జ‌రుపుకోనుండ‌గా, ఇటీవ‌ల షోకి సంబంధించి చిన్న ప్రోమో విడుద‌ల చేశారు. దీంతో త్వ‌ర‌లోనే బిగ్ బాస్ సీజన్ 7 ప్రారంభం కానుందని ఓ అంచనాకి వ‌చ్చారు. ఇక షోలో పాల్గొనే కంటెస్టెంట్స్ ఎవ‌ర‌నే దానిపై అధికారిక ప్ర‌క‌ట‌న రావ‌ల‌సి ఉంది. కాక‌పోతే షోలో వారు వీరు పాల్గొంటున్న‌ట్టు అనేక ప్ర‌చారాలు సాగుతున్నాయి. ప్రతి సీజన్లోను కాంట్ర‌వ‌ర్షియ‌ల్ కంటెస్టెంట్స్‌ని ప్ర‌వేశ పెడుతూ షోపై ఆస‌క్తి పెంచే ప్ర‌య‌త్నం చేస్తున్నారు. ఈ సారి బుల్లి తెర మెగా స్టార్ ప్రభాకర్ ని బిగ్ హౌస్ లోకి ప్ర‌వేశపెట్ట‌బోతున్న‌ట్టు స‌మాచారం.
యాహు అనే టీవీ షో తో మంచి క్రేజ్ తెచ్చుకున్న ప్రభాకర్ ఆ తర్వాత బుల్లితెర‌పై నానా హంగామా చేశాడు. సీరియల్స్ , షోస్ చేస్తూ అశేష ప్రేక్ష‌కాదర‌ణ ద‌క్కించుకున్నాడు. సీరియల్స్ లో నటించడమే కాకుండా కొన్ని సీరియల్స్ కి దర్శకత్వం కూడా వహించాడు ప్రభాకర్. ఇక సినిమాల‌లోను న‌టుడిగా అద్భుత ప్రద‌ర్శ‌న క‌న‌బ‌రిచాడు. ఆపరేషన్ దుర్యోధన సినిమాలో పోలీసుగా నటించి ఆకట్టుకున్న ప్రభాకర్.. ఆ తర్వాత కూడా కొన్ని సినిమాల‌లో నటించి అల‌రించాడు. ఇప్పుడు ఆయ‌న త‌న కుమారుడిని హీరోగా పరిచయం చేయాల‌ని ఉబ‌లాట‌ప‌డుతున్నాడు.
ఈ నేప‌థ్యంలో కొడుకుని బిగ్ బాస్ కి పంపాల‌ని అనుకుంటున్నాడ‌ట. బిగ్ బాస్ షోకి వెళితే కొంత పాపులారిటీ ద‌క్కుతుంది కాబ‌ట్టి, ప్రభాకర్ ఈ నిర్ణ‌యం తీసుకున్న‌ట్టు స‌మాచారం. మ‌రోవైపు కొడుకుతో పాటు ప్రభాకర్ కూడా బిగ్ బాస్ హౌజ్ లోకి వెళ్ల‌నున్న‌ట్టు వార్త‌లు వ‌స్తున్నాయి. దీనిపై త్వ‌ర‌లోనే క్లారిటీ రానుంది. ఇక మరో ఇంట్రెస్టింగ్ న్యూస్ ఏంటంటే.. ప్రభాకర్ తనయుడు చంద్రహాస్ ఇటీవ‌ల యాటీడ్యూడ్ స్టార్ అని బిరుదు కూడా తగిలించుకున్నాడు. కాస్త డిఫరెంట్ గా.. పొగరుగా ఉన్న ఈ కుర్రాడు ప్రేక్షకులని అల‌రిస్తాడ‌ని కొంద‌రు చెప్పుకొస్తున్నారు.
